Perezida Kagame yitabiriye Inama ya AU muri Ethiopia
Perezida Kagame yageze mu Mujyi wa Addis Ababa muri Ethiopia aho yitabiriye Inama isanzwe ya 37 y’Abakuru b’Ibihugu na za Guverinoma zigize Umuryango wa Afurika Yunze Ubumwe, AU.
Umukuru w’Igihugu biteganyijwe ko ageza ku bitabiriye iyi nama, itangira kuri uyu wa Gatanu, raporo igaragaza intambwe imaze guterwa mu guharura inzira y’amavugurura ya AU yahawe kuyobora.
Muri Nyakanga 2016 ni bwo Perezida Kagame yahawe inshingano zo gukurikirana amavugurura akenewe muri AU hagamijwe gufasha uyu muryango kugera ku ntego z’icyerekezo cya 2063.
Ku wa 8 Gashyantare 2024, Perezida Kagame yaganiriye n’abagize Itsinda ayobora ryashyiriweho gukora amavugurura muri AU. Iyi nama yasuzumiwemo ishyirwa mu bikorwa ry’ayo mavugurura inakomoza ku kamaro ko gukomeza gutera intambwe iganisha ku iterambere rirambye muri uyu muryango.
Ibikorwa byo kuvugurura imikorere y’inzego nkuru za AU byatekerejweho hagamijwe guhangana n’ibibangamiye Afurika no gushyira mu bikorwa porogaramu zihutisha ubukungu n’iterambere ryifuzwa.
Perezida Kagame yashimye itsinda rikomeje gutanga umusanzu mu mavugurura yari akenewe ku mugabane, anashimangira ko hari intambwe imaze guterwa kuva uru rugendo rutangiye.
Kugeza ubu Ikigega cya AU cy’Amahoro kimaze kugeramo miliyoni 400$ ndetse umusanzu w’ibihugu by’ibinyamuryango utangwa neza.
Mu nama yabereye mu Rwanda muri Nyakanga 2016 ni bwo Perezida Kagame yahawe gusuzuma ibintu bikeneye kuvugururwa muri AU nyuma akabitangira raporo. Muri Mutarama ni bwo yayishyikirije abandi bakuru b’ibihugu, barayishimira, imyanzuro irimo barayishyigikira bamusaba gukurikirana uko izashyirwa mu bikorwa.
Ayo mavugurura yibanze ku kureba uko AU yakibanda ku bintu by’ingenzi mu rwego rw’umugabane wose no kongerera ubushobozi imiryango y’uturere igamije ubukungu; gushyira ku murongo inzego za AU hagendewe ku by’ingenzi zigomba gukorera umugabane, guhuza uyu muryango n’abaturage no gutera inkunga ibikorwa bya AU hagamijwe kwihaza mu bukungu no gusezerera inkunga z’amahanga.
