Kigali: Abazunguzayi 195 bahawe ibibanza mu isoko mu guca ukubiri n’ubucuruzi bw’akajagari

0

Abari abazunguzayi 195 mu bice bitandukanye mu Karere ka Nyarugenge bahawe ibibanza muri ‘Ejo Heza Modern Market’ mu rwego rwo guca burundu ubucuruzi bw’akajagari no kurandura ingaruka mbi ziterwa nabwo.

Mukashema Assoumpta, wari umaze imyaka 25 azunguza yahise atangira akazi mu isoko rya Ejo Heza

Uyu muhango wabaye kuri uyu wa 11 Kanema 2022 ku isoko rya Ejo Heza riherereye mu Karere ka Nyarugenge, Umurenge wa Gitega ahazwi nka Nyabugogo.

Iki gikorwa cyo gukura abazunguzayi mu mihanda giteganyijwe gukorwa mu turere twose tugize Umujyi wa Kigali aho amasoko n’amaguriro 17 yo gukoreramo ubucuruzi yateganyijwe kugira ngo abava mu mihanda abe ariho bakomereza ubucuruzi bwabo.

Nyuma y’igihe cy’amezi atatu aba bahawe ibibanza n’ibwo bazatangira kwiyishyurira ibisabwa byose kugira ngo bakoreshe ibyo bibanza ariko bakazakomeza kwishyurirwa ubukode no gukurikiranwa mu gihe cy’umwaka.

Umuyobozi Mukuru w’Ikigo gishinzwe gutera Inkunga ibikorwa by’Iterambere mu nzego z’Ibanze, LODA, Nyinawagaga Claudine, yavuze ko iyi gahunda igamije guteza imbere abatishoboye barimo n’abazunguzayi.

Ati “Nyuma yo kubaha ibibanza tuzabaha amahugurwa ajyanye no gucunga no gukoresha neza imari hari kandi n’inguzanyo zabateganirijwe aho uzajya ayifata azajya ayishyura ku nyungu y’amafaraga 2% mu gihe cy’umwaka. Izabafasha cyane mu kwiteza imbere kugeza igihe bahindutse abashoramari.”

Yakomeje agira ati “Kuva ku mihanda bakajya mu masoko bigabanya ibyago bahuraga nabyo ndetse bimuha umutekano uhagije waba uwe cyangwa ibicuruzwa bye.”

Nyinawagaga yavuze ko intego bafite ari uguca burundu ubuzunguzayi bityo n’uwaba wacikanwe n’aya mahirwe yabagana akaba yahabwa ikibanza nawe agatangira urugendo rwo kwiteza imbere no kubaka ubushobozi.

Iki gikorwa cyo guha abazunguzayi ibibanza cyabereye mu isoko rya Ejo Heza ndetse no mu Karere ka Kicukiro mu isoko rya Giporoso aho abazunguzayi basaga 50 bashyikirijwe ibibanza.

Umubyeyi wamaze imyaka itandatu mu buzunguzayi hakaba hashize n’andi 6 ahawe ikibanza mu isoko, Dushimimana Jeanne, avuga ko ntako bisa iyo ufite aho ukorera ntawe ukwirukankana.

Yavuze ko kuba asigaye afite aho abarizwa bituma abona uko yishyura amafaranga y’ishuri y’abana ndetse akabasha no kwishyura ubwisungane mu kwivuza ku gihe akaba ashima Leta yabatekerejeho.

Undi wari umaze imyaka itatu azunguza ibiribwa, Nyirabakungu Anita, yavuze ko iyo uzunguza ushobora gupfa igihe icyo ari cyo cyose kubera kwiruka uhunga abashinzwe umutekano ndetse ko ibyago byo gufungwa bya hato na hato byiyongera.

Yagize ati “kuba mpahwe ikibanza kano kanya ndishimye ubu ndi gusaba Imana izampe abakiliya kugira ngo nkomeze ntunge umuryango wanjye kandi ngire ibibazo nkemura.”

Ubuyobozi bw’Umujyi wa Kigali bwasabye aba bahawe ibibanza no kubiyambaza mu gihe bahuye n’ikibazo mu rwego rwo kwirinda ko basubira mu mihanda.

Mukashema Assoumpta yavuze ko yatangiye kuzunguza afite imyaka 12 nyuma aza guterwa inda ubu akaba yari amaze imyaka imyaka 25 azunguza ibiribwa.

Yavuze ko yiteguye gukoresha imbaraga akirinda ibihombo mu kazi no kwikuramo imyumvire yo gukorera mu muhanda, ahamya ko afite icyizere ko ubuzima bugiye guhinduka kuko yabonye abakoraga nk’ibyo yavuyemo babashize kwiteza imbere.

Umuyobozi w’Umujyi wa Kigali Wungirije ushinzwe Ubukungu n’Imibereho y’Abaturage, Urujeni Martine, yahamagariye aba bahawe ibibanza gukorera hamwe kuko bigeza ku iterambere kandi mu gihe gito.

Yagize ati “Amahirwe bafite hano mu isoko aruta cyane uko babagaho mu mihanda. Turabasaba ko babwira n’abandi ibibi byo gukorera mu mihanda kugira ngo nabo bagane aho bashobora gukorera neza ntakibazo.”

Yavuze ko hari imbaraga zizashyirwamo kugira ngo aba bari gushyira mu masoko batazongera gusohoka ngo basubire mu mihanda.

Iki gikorwa giteganijwe gukorwa mu gihe cy’icyumweru mu bice bitandukanye bigize Umujyi wa Kigali.

Share This